Eks-spikerin ailə biznesi

Milli Məclisin keçmiş spikeri, deputat Oqtay Əsədov da fürsətdən yararlanıb, var-dövlət sahibi olanlardandı.

Əsədovun həyat yoldaşı Zemfira Əsədova 2009-cu ilin martında Nyu-Yorkun Linkoln meydanı ətrafında (Adagio Condominium) dəyəri 1.825.000 dollar olan üçotaqlı mənzili (2017-ci ildə mənzilin bazar qiyməti 3.5 milyon dollara qədər artıb) almaq barədə Douglas Elliman Real Estate əmlak şirkəti ilə razılaşma əldə edib. Müqaviləyə görə Oqtay Əsədovun Bakı şəhəri,  Xəqani küçəsi 25-də qeydiyyatda olan xanımı Zemfira Adil qızı Əsədova Nyu-York, Manhatten, 243 W 60th St APT 3B ünvanındakı mənzil üçün məbləğin ilkin 182.500 dollarını onu imzalayarkən, qalan 1.642.500 dollarını isə əmlakın alıcının adına keçirilməsindən sonra ödəməli idi. Vəsait JPMorgan Chase Bank üzərindən Belkin Burden Wenig & Goldman, LLP-nin hesabına ödəniləcəkdi. Amma hansısa səbəbdən alqı-satqı təxirə düşüb. Oqtay Əsədovun  restoranları, mülkləri, barları, hətta saunası belə var. Həyat yoldaşı Zemfira Əsədova Bakıda yerləşən 175 nömrəli Şənlik uşaq bağçasının müdirəsi olduğu günlərdə Moskvada sauna işlədib. “Kapriz” adını daşıyan sauna şəxsən Zemfira Əsədovanın öz adına qeydiyyatdan keçiririlib. Məlum olmuşdu ki, Zemfira Əsədova təkcə “Kapriz”dən 1 ilə 130 min dollar qazanır. Əsədovlar Rusiya paytaxtında Avropanın ən hündür yaşayış binası olan “Triumph Palace”da məskunlaşıblar. Eks-spikerin həyat yoldaşı Zemfira Əsədova bu binada dəyəri 10 milyon manata yaxın olan 2 lüks mənzilin sahibəsidir. “Arizarum Qrup” MMC-də Əsədovun həyat yoldaşına məxsusdur. Qızları Nərminə və Nigar Bakıda bahalı geyimlər satan mağazalara, uşaq bağçalarına, restoranlara rəhbərlik edirlər. “Yeni Nəfəs” akademiyası, “Yeni Nəfəs” uşaq bağçası, “Mozaik Group” brend geyimlər şirkəti, Sumqayıtda olan “Azkompozit” zavodu eks-spikerin ailə biznesinin görünən tərəfidir. Şüvəlandakı 2 hektardan artıq ərazini əhatə edən dəbdəbəli imarətin ərazisində də xaricdən gətirtdiyi mütəxəssislər tərəfindən biri açıq, digəri qapalı olan 2 tennis kortu və futbol meydançası quraşdırılıb. Əsədovun kürəkəni Mehman Qocayevin Londonun ən bahalı bölgəsində 1 milyonluq mülkü var. O bölgədə ki, orda ölkənin ən zəngin milyarderləri, məşhur aktyorları və pop-divaları yaşayır. Həmin mülklə bağlı yayılmış sənədlərdə bildirilirdi ki, penthauzun alınması üçün “Goldbek Investment” şirkətinə milyon funt vəsait ödənilib. Əmlakın alınması tarixi Mehman Qocayevin doğum günü ilə üst-üstə düşür. Bu, o deməkdir ki, penthauzu Mehman Qocayevə bağışlayıblar. Əsədovlar ailəsinin Dubayda və Türkiyədə də dəbdəbəli  mülklər aldığı barədə məlumatlar var. “ANT MTK”da Oqtay Əsədova məxsusdur. Bu şirkət Bakıda onlarla hündürmərtəbəli binalar tikib. Araşdırmaçı jurnalist Cavanşir Həsənli də  Oqtay Əsədovun biznes şəbəkəsini araşdırıb və aşağıdakı siyahını yayımlayıb.

1. “ARIZARUM GRUPP” MƏHDUD MƏSULİYYƏTLİ CƏMİYYƏTİ (ООО “АРИЗАРУМ ГРУПП”) 1998-ci il yanvarın 14-də 10 min rubl nizamnamə kapitalı ilə Rusiya paytaxtında Bakinskaya 29 ünvanında Oqtay Əsədovun həyat yoldaşı Zemfira Əsədova Adil qızının adına rəsmiləşdirilib. Şirkət restoran biznesini əhatə edir, 2018-ci il maliyyə hesabatına görə gəliri 13 984 000,00 rubl təşkil edib. Moskvadakı məşhur “KAPRİZ” gecə klubu bu şirkətə aiddir. Şirkətin baş direktoru Larisa Nazarovadır.

2. “KASMET” MƏHDUD MƏSULİYYƏTLİ CƏMİYYƏTİ (ООО “КАСМЕТ”)  2005-ci ilin iyunun 2-də Həştərxanda 10 min rubl nizamnamə kapitalı ilə qeydiyyata alınıb. Şirkətin pay bölgüsü üzrə hissələtin 34 faizi Əsədov Namiq Oqtay oğluna aid olub. Şirkətə qiymətli metalların (o cümlədən qızıl), daşların işlənməsi, emalı ilə məşğul olmaq üçün lisenziya verilib. Şirkət 2018-ci ilin aprelində ləğv edilib.

3. “GEO STRETCHEN” LTD (შპს ჯეო სტრაქშენ) 2015-ci noyabrın 15-də Tiflis, Didgori bölgesi, S.Tavkisi ünvanında 454410236 saylı lisenziya ilə hüquqi qeydiyyata alınıb. Şirkətin 37.5 faizi Namiq Əsədovun, 25 faizi Lyama Abbasbəylinin, 37.5 faizi isə Gürcüstan vətəndaşı Gia Akhobadzeyə aiddir.